Circulus Brevis sss+

CIRCULUS BREVIS SOCIORUM SACERDOTALIS SANTÆ CRUCIS

Veni, Sancte Spíritus, reple tuórum corda fidélium: et tui amóris in eis ignem accénde.

Ꝟ. Emítte Spíritum tuum, et creabúntur.

℟. Et renovábis fáciem terræ.

Oremus.

Deus, qui corda fidélium Sancti Spíritus illustratióne docuísti; da nobis in eódem Spíritu recta sápere; et de eius semper consolatióne gaudére. Per Christum Dóminum nostrum.

℟. Amen.

Ꝟ. In nómine Patris  et Fílii et Spíritus Sancti. Amen.

Sancta María, Spes Nostra, Sedes Sapiéntiæ.

℟. Ora pro nobis.

Commentarium in Evangelium.

Lectio Normarum vitæ (quæ fit a directore, omnes autem audiunt stantes).

Normæ vitæ:

Quotídie: Operum oblátio. Orátio mentális (per dimídiam horam mane, et per álteram dimídiam véspere). Sancta Missa. Commúnio. Visitátio Sanctíssimi Sacraménti. Léctio Novi Testaménti et alicúius libri spirituális. Preces. Sanctum Rosárium. Exámina consciéntiæ. “Angelus Dómini” vel “Regína Cœli”.

Síngulis hebdómadis: Conféssio sacramentális. Corporalis mortificátio et cantus aut recitátio antíphonæ Beátæ Mariæ Vírginis, sábbatis.

Síngulis ménsibus: Dies recéssus spirituális.

Síngulis annis: Cursus recéssus spirituális.

Semper: Præséntia Dei. Considerátio nostræ filiatiónis divínæ. Communiónes spirituáles. Actiónes gratiárum. Actus reparationis. Orationes iaculatóriæ. Mortificátio. Stúdium. Labor. Ordo. Gáudium.

Commentarium in aliquam Normam vitæ vel Consuetudinem, vel in aliquem aspectum Spiritus Operis Dei, etc.

Examen:

Prætermísi meditatiónem, aut eius tempus mínui, extra casum infirmitátis?

Exércui me in præséntia Dei, et frequénter, síngulis diebus, considerávi meam filiatiónem divínam?

Curávi ut mea prima et postréma cuiúsque diéi cogitátio Deo sacrarétur?

Omísi examen particuláre, vel præceps festinávi generále?

In Sancta Missa, mémini quotídie Operis Dei, fratrum meórum, speciátim vero Directórum?

Recténe tuli contrarietátes diéi?

Omísi sólitas mortificatiónes?

Sátago acquírere spíritum pœniténtiæ?

Rectam quæsívi intentiónem, sola Dei glória ductus in ómnibus?

Recitávi quiéte et atténte Litúrgiam horárum, Preces Operis et réliquas oratiónes vocáles?

Vixi spíritum sacrifícii in apostolátu mihi commísso?

Dócilis fui in accipiéndis consíliis quoad vitam spirituálem et apostolátum personálem?

Díligens fui in obeúndis munéribus apostólicis in Opere mihi commíssis?

Studiósus fui exercéndæ caritátis in consuetúdine cum frátribus meis et cum céteris diœcésis sacerdótibus?

Memor fui, speciátim, normárum caritátis et prudéntiæ in exercénda vel excipiénda correctióne fratérna, quóties opus fúerit?

Osténdo factis zelum meum lucrándi Operi Dei novos fidéles?

Cónscius sum me intulísse Ecclésiae atque Operi Dei malum certum ob meam apathíam, imprudéntiam, tepiditátem vel frigiditátem in perfunctióne mei ministérii sacerdotális vel in adimpletióne meárum obligatiónum sociálum?

Quo pacto me gessi in labóre cultúræ, necessário quidem ad scopum meum attingéndum, in stúdio vel formatióne professionáli utilíque témporis usu?

Supérfluos sumptus impéndi, luxu, levitáte, vanitáte, commoditáte, etc.?

Fui semper profúnde sincérus in directióne spirituáli, apte compónens spontaneitátem et responsabilitátem personálem, cum humilitáte submísse et ex corde excipiéndi consília circa meam vitam spirituálem et apostolátum personálem meque plene cum ipsis identificándi?

Despéxi sacrifícium in mínimis rebus quotidiánis?

Curávi semper diligentérque ut labor meus ita ordinarétur, ut munus mihi commíssum efficácius fíeret et Dei glória magis magísque augerétur?

Labóro quando laboráre débeo (hódie, nunc), aut procrastinatiónibus me decípio, quæ omissiónibus pares sunt?

Est mihi cura vitándi in aspéctu extérno quidquid moléstum, mirum, extráneum, dedéceat munus et conditiónem meam?

Dominávit me tristítia, atque oblítus sum illam inimíco ánimæ meæ fœderári?

Labóro semper cum gáudio sciéntis se fílium Dei esse?

Ꝟ. Adiutórium nostrum  in nómine Dómini.

℟. Qui fecit cœlum et terram.

Confíteor Deo omnipoténti, beátæ Maríæ semper Vírgini, beáto Michaëli Archángelo, beáto Ioánni Baptístæ, sanctis Apóstolis Petro et Paulo, ómnibus Sanctis, et vobis, fratres, quia peccávi nimis cogitatióne, verbo et ópere: mea culpa, mea culpa, mea máxima culpa. Ideo precor beátam Maríam semper Vírginem, beátum Michaëlem Archángelum, beátum Ioannem Baptístam, sanctos Apóstolos Petrum et Paulum, omnes Sanctos, et vos, fratres, oráre pro me ad Dóminum, Deum nostrum.

Deinde dicitur:

Ꝟ. Misereátur nostri omnípotens Deus, et, dimissis peccátis nostris, perdúcat nos ad vitam ætérnam.

℟. Amen.

Ꝟ. A vínculis peccatórum nostrórum  absólvat nos omnípotens et miséricors Dóminus.

℟. Amen.

Si director Circuli sit Sacerdos, director recitat Confíteor ut supra. Postea reliqui respondent:

Ꝟ. Misereátur tui omnípotens Deus, et, dimissis peccátis tuis, perdúcat te ad vitam ætérnam.

℟. Amen.

Deinde omnes, directore excepto, recitant Confíteor, et ubi dicitur: vobis, fratres, et vos, fratres, dicunt: tibi, pater, et te, pater.

Ꝟ. Misereátur vestri omnípotens Deus, et, dimissis peccátis vestris, perdúcat vos ad vitam ætérnam.

℟. Amen.

Ꝟ. A vínculis peccatórum nostrórum  absólvat nos omnípotens et miséricors Dóminus.

℟. Amen.

Postea qui, prævia consultatione, libere velit actum pœnitencialem facere, genuflexus manifestabit aliquem suum defectum (non peccata, neque res conscientiæ), dicens:

Initio: Coram Deo Dómino Nostro confíteor…

In fine: Propter has culpas peto véniam et pœniténtiam.

Director singulis suggerit brevem aliquam orationem vel parvam mortificationem, ut mos est.

Lectio alicuius libri spiri tualis et commentarium, vel allocutio.

Colloquium de rebus Operis.

Preces.